Ilegal na Open Pipes, Winasak sa San Rafael

Bilang bahagi ng kampanya para sa isang mas tahimik at ligtas na komunidad, isinagawa ng Pamahalaang Bayan ng San Rafael ang Seremonyal na Pagwasak ng mga Nakumpiskang Open Pipe at Modified Muffler ngayong araw.

Ang aktibidad na ito ay bunga ng pinaigting na pagpapatupad ng mga lokal na ordinansa at batas trapiko na nagbabawal sa paggamit ng mga maiingay at ilegal na kagamitan sa mga sasakyan. Layunin ng nasabing hakbang na masugpo ang noise pollution na nagdudulot ng abala sa mga residente at panganib sa kalsada.

Sa ilalim ng direktiba nina Mayor Cipriano D. Violago, Jr. at Vice Mayor Edison M. Veneracion, naging matibay ang paninindigan ng lokal na kapulisan at mga traffic enforcers sa pagkumpiska ng mga gamit na hindi aprubado at hindi alinsunod sa pamantayan ng batas.

Ang seremonyal na pagwasak ay nagsisilbing malinaw na babala sa mga motorista: ang pamahalaan ay hindi magdadalawang-isip na ipatupad ang batas upang mapanatili ang disiplina sa kalsada. Patuloy ang panawagan ng munisipyo para sa kooperasyon ng bawat isa upang matiyak ang isang maayos at payapang San Rafael para sa lahat.