LGU San Rafael, Nagtipon para sa Rizal Day

Bilang pagpupugay sa ika-129 anibersaryo ng kabayanihan ng ating Pambansang Bayani, ang Pamahalaang Bayan ng San Rafael ay nakiisa sa buong bansa sa pagdiriwang ng Rizal Day ngayong umaga.

Sa pangunguna nina Punong Bayan Kgg. Cipriano D. Violago, Jr. at Pangalawang Punong Bayan Kgg. Edison M. Veneracion, isinagawa ang isang solemne na seremonya ng pag-aalay ng bulaklak sa bantayog ni Gat. Jose Rizal na matatagpuan sa loob ng San Rafael Government Center.

Naging saksi sa nasabing aktibidad ang mga Kagawad ng Sangguniang Bayan, mga Pinuno ng iba’t ibang departamento ng munisipyo, at ang mga Punong Barangay.

Ayon sa pamunuan, ang pag-alala kay Rizal ay hindi lamang pagbabalik-tanaw sa kasaysayan, kundi isang hamon sa bawat kawani ng gobyerno na maglingkod nang may talino, integridad, at tunay na pagmamahal sa bayan—mga katangiang ipinamalas ng pambansang bayani.