Vice Mayor Veneracion, Nakiisa sa Blessing ng Makabagong Barangay Hall sa Caingin

Isang mahalagang hakbang tungo sa mas maayos na paglilingkod sa komunidad ang naganap matapos pormal na buksan ang bagong Barangay Hall ng Barangay Caingin noong ika-9 ng Pebrero, 2026.

Nakiisa sa naturang Blessing at Ribbon Cutting Ceremony ang ating Pangalawang Punong Bayan Igg. Edison M. Veneracion. Ang seremonya ay nagsilbing simbolo ng pag-unlad at pagkakaisa ng lokal na pamahalaan at ng pamunuan ng barangay upang ihatid ang mas de-kalidad na pasilidad para sa mga residente.

Sa mensaheng ibinahagi ni "Kuya Edison," binigyang-diin niya na ang bagong gusali ay hindi lamang isang istruktura, kundi isang sentro kung saan dapat maramdaman ng bawat mamamayan ng Caingin ang tapat, episyente, at mabilis na serbisyo-publiko. Ang proyektong ito ay bahagi ng patuloy na pagsuporta ng Pamahalaang Bayan, sa ilalim nina Mayor Cipriano D. Violago, Jr. at Vice Mayor Veneracion, sa pagpapalakas ng kapasidad ng bawat barangay.

Inaasahang sa pamamagitan ng bagong pasilidad na ito, mas magiging komportable ang mga transaksyon ng mga mamamayan at mas magiging masigla ang pagpapatupad ng mga programa para sa kapakanan ng lahat.