National Women’s Month 2026: Pagkilala sa Galing at Lakas ng mga Kababaihang San Rafaeleño

Sa pagpasok ng buwan ng Marso, pormal na nagpahayag ng taos-pusong pakikiisa ang Pamahalaang Bayan ng San Rafael sa pagdiriwang ng National Women’s Month 2026. Ang selebrasyong ito ay isang mahalagang hakbang upang kilalanin ang hindi matatawarang papel at ambag ng mga kababaihan sa loob ng tahanan, komunidad, at sa buong lipunan.

Sa ilalim ng pamumuno nina Punong Bayan Kgg. Cipriano D. Violago, Jr. at Pangalawang Punong Bayan Kgg. Edison M. Veneracion, binigyang-pugay ang bawat ina, kapatid, anak, guro, lider, at manggagawa na nagsisilbing inspirasyon at tunay na lakas ng ating bayan. Ayon sa pamunuan, ang sipag, talino, at tapang ng mga kababaihang San Rafaeleño ang nagsisilbing pundasyon sa pagbuo ng isang mas maunlad at makatarungang komunidad.

"Ang layunin natin ay hindi lamang ang magdiwang, kundi ang patuloy na isulong ang pagkakapantay-pantay, paggalang sa karapatan, at pagbibigay ng patas na oportunidad para sa lahat," anang mga opisyal.