Ocular Inspection sa The One Private Resort, Pinangunahan ng Sangguniang Bayan ng San Rafael

Upang matiyak ang kaligtasan ng mga mamamayan at ang legalidad ng mga operasyon ng mga negosyo sa bayan, nagsagawa ng isang Ocular Inspection ang Sangguniang Bayan ng San Rafael sa The One Private Resort na matatagpuan sa Barangay Banca-banca.

Ang inspeksyon ay personal na pinangunahan ni Pangalawang Punong Bayan Kgg. Edison M. Veneracion, kasama ang mga Kagawad ng Sangguniang Bayan. Ang hakbang na ito ay bahagi ng mandato ng lehislatura na subaybayan ang mga establisimyento sa loob ng San Rafael upang masiguro na sila ay tumatalima sa mga umiiral na ordinansa at pambansang alituntunin.

Sa isinagawang pagbisita, sinuri ng mga opisyal ang mga dokumento, pasilidad, at mga safety protocols ng resort. Layunin nito na mapanatili ang kaayusan at masiguro ang proteksyon ng mga turistang bumibisita rito, pati na rin ang kapakanan ng komunidad na nakapaligid sa nasabing negosyo.

Ayon kay "Kuya Edison," ang ganitong mga inspeksyon ay hindi lamang para sa regulasyon, kundi isang paraan upang magabayan ang mga local business owners sa tamang pamamalakad. Ito ay bahagi ng mas malawak na adhikain nina Mayor Cipriano D. Violago, Jr. at Vice Mayor Veneracion na gawing business-friendly at ligtas ang buong San Rafael para sa lahat.