Paalala ng Pamahalaang Bayan Ukol sa Nipah Virus

Sa gitna ng mga ulat tungkol sa kaso ng Nipah Virus (NiV) sa ibang bansa, muling nagpapaalala ang Pamahalaang Bayan ng San Rafael sa lahat ng mamamayan na manatiling alerto at mapanuri para sa kaligtasan ng pamilya.

Ang Nipah Virus ay isang uri ng zoonotic virus, o sakit na nagmumula sa mga hayop (gaya ng paniki at baboy) na maaaring maipasa sa tao. Bagama't wala pang naiuulat na kaso sa ating bayan, mahalaga ang maagang kaalaman upang mapigilan ang anumang banta ng impeksyon.

Batay sa gabay ng Department of Health (DOH), narito ang mga dapat bantayan:

Mga Karaniwang Sintomas:

• Matinding lagnat at sakit ng ulo

• Pag-ubo at hirap sa paghinga (parang trangkaso)

• Pananakit ng lalamunan at kalamnan

• Sa malalang kaso: pagkalito, kombulsyon, o pamamaga ng utak (encephalitis)

Pinapayuhan ang lahat na panatilihin ang kalinisan sa katawan, iwasan ang pagkain ng mga prutas na may kagat ng hayop, at agad na sumangguni sa pinakamalapit na Rural Health Unit (RHU) kung nakararanas ng mga nabanggit na sintomas.