Pag-alala sa Unang Republika sa Malolos

Bilang pagkilala sa mahalagang bahagi ng ating kasaysayan, nagbahagi si Pangalawang Punong Bayan Kuya Edison Veneracion ng isang makabuluhang paalala tungkol sa pagkakatatag ng Unang Republika ng Pilipinas sa Malolos.

Noong Enero 20, 1899, pinagtibay ang Konstitusyon ng Malolos sa Simbahan ng Barasoain—ang kauna-unahang demokratikong konstitusyon sa buong Asya. Ito ang nagsilbing pundasyon para sa opisyal na deklarasyon ng Unang Republika noong Enero 23, 1899, sa ilalim ng pamumuno ni Pangulong Emilio Aguinaldo.

Ayon kay Kuya Edison, bagama't maikli ang panahong iyon, ito ay isang dakilang patunay ng kakayahan ng mga Pilipino na magkaisa at magtatag ng isang pamahalaang nakabatay sa batas, soberanya, at tunay na demokrasya. Ang pag-alalang ito ay layuning magsilbing inspirasyon sa mga San Rafaeleño, lalo na sa mga kabataan, na pahalagahan ang kalayaang tinatamasa ng bansa ngayon.