PESO San Rafael, Pinangunahan ang Career Guidance para sa mga Grade 10 at 12 Students

Bilang bahagi ng malawak na programa para sa kabataan ni Mayor Cipriano D. Violago, Jr., matagumpay na isinagawa ng Public Employment Service Office (PESO) San Rafael ang isang Career Guidance Forum sa Salapungan National High School (SNHS).

Ang aktibidad ay dinaluhan ng mga mag-aaral mula sa Grade 10 at Grade 12, na nasa krusyal na yugto ng pagpili ng kanilang tatahaking landas sa kolehiyo at mundo ng pagtatrabaho. Layunin ng forum na bigyan ang mga estudyante ng sapat na kaalaman tungkol sa iba't ibang career paths, kasanayan (skills), at mga oportunidad na naghihintay sa kanila pagkatapos ng pag-aaral.

Naging matagumpay ang inisyatibong ito sa pakikipagtulungan nina PESO Senior Labor and Employment Officer Reela I. Tuazon, SNHS Principal Mr. Rodrigo Jacinto, at ng mga dedikadong guro ng paaralan. Sa pamamagitan ng forum na ito, nabigyan ng kumpiyansa ang mga kabataan na gumawa ng matalinong desisyon para sa kanilang kinabukasan.

Ayon sa PESO San Rafael, ito ay simula pa lamang ng mas malawak na ugnayan sa iba't ibang mataas na paaralan sa ating bayan upang matiyak na ang bawat mag-aaral ay may sapat na gabay tungo sa tagumpay.