Sangguniang Bayan, Magdaraos ng Public Hearing sa Isyu ng Budget at Liquidation

Sa layuning higit na mapataas ang antas ng transparency at disiplina sa paghawak ng pampublikong pondo, magsasagawa ng isang mahalagang Pampublikong Pagdinig (Public Hearing) ang Sangguniang Bayan ng San Rafael sa darating na Lunes, ika-23 ng Pebrero, 2026.

Ang pagtitipon ay pangungunahan ni Pangalawang Punong Bayan Kgg. Edison M. Veneracion at ni Kgg. Edlin M. Indon, ang Tagapangulo ng Committee on Finance, Budget and Appropriation, kasama ang mga miyembro ng Sangguniang Bayan.

Tatalakayin sa nasabing pagdinig ang dalawang (2) panukalang ordinansa na may malaking epekto sa pamamahala ng pananalapi sa antas ng barangay:

1. Mandatoryong pagsusumite ng buwanang financial, liquidation, at utilization reports ng lahat ng barangay sa Municipal Accounting Office.

2. Pagtatakda ng mga deadline o takdang petsa para sa pagsusumite ng Annual Budget ng pamahalaang bayan at ng lahat ng mga barangay.

   
   

Inaasahang dadalo sa nasabing aktibidad ang lahat ng mga Punong Barangay, Sangguniang Barangay members, SK Chairpersons, mga Ingat-Yaman (Treasurers), at ang Local Finance Committee. Ayon sa Sangguniang Bayan, ang presensya ng mga opisyal ay krusyal upang matiyak na ang mga bagong regulasyong ito ay magiging praktikal at epektibo sa pagpapatupad.

Ang pagdinig ay gaganapin sa 3rd Floor RCS Building, Municipal Compound simula alas-9:00 ng umaga. Ang hakbang na ito ay bahagi ng adbokasiya nina Mayor Cipriano D. Violago, Jr. at Vice Mayor Veneracion para sa isang pamahalaang tapat, accountable, at may maayos na sistema ng pananalapi para sa kapakanan ng bawat San Rafaeleño.